Stands os conscience

En id dwot capitule os "I Sept Akmaks", dankend-ye naturelika Olivier Simon ob eys correctures ed explications.

Woisit is eet un fur. Bet id categoria in quod is wohs ne interessit iom. Maghses id werd fur ne esiet in consonance con eys inner stand. Existit alter khisses, nam-ye id rund silence entrend kam un cylinder ex stal id masse os eys cranium, tem quem id likwit boder iom pro quanto quo ne se relatit con eys bieda. 

 

Tod circule os silence ed os temos interrupit id continuen om eys idees, tem quem Erdosain ne ghohdit assocye, samt id kleitu os sien raisonen, sien hem kalen dom con id institution kyusen med id nam os karcer. 

 

Mohnit telegramme-ye, suppremend-ye prepositions, quo est erghend. Ghatit mohrta hors in qua habiet ghohden ferface quosquid buhsa, aun ob to is habiet id mulayim mehn os sien responsibilitat. Logic-ye, un judce ne habiet preten talg phenomen. Bet is ja eet tuich, eet un charapakh os wir moven ab id automatisme ios adet.

Sei continuit orbatend-ye in id Sukercompagnie ne buit kay raubhe meis mikdars om denars, bet ob eespeht un extraordinar wakya —immense-ye extraordinar— quod dahiet un neskohpten wehrtmen eysi gwit ed iom salviet ud id catastrophe quod is vis oistehmbe proscher eys dwer. 

 

Tod stumia os sogn ed achak quod kwehlih iom per ia diens kam un swehpghanger, Erdosain namdehsit id, "id zone ios gjian". 

 

Erdosain fikrit od solgo zone existit uper id nivell iom urbs, ye dwo meters hog, ed depigit id sib graphic-ye sub id forme tom regions om salines au deserts qua in ia maps sont bekipen med pointovals, tant bengu quem ia mleges as un seld. 

 

Tod zone os gjian eet id consequence ios paytten im anghens. Ed kam un nebh os iadic gas id bewohgh se gwaur-ye pointtos altro, penetrend-ye walls ed tehrend-ye ia binas, aun luses sien plane ed horizontal forme; gjian om dwo dimensions quod guiliotinend-ye ia gurgules likwit in ta senters un posgust os oisleucten. 

 

Talg eet id bfwendwanen quod Erdosain sib dahsit quando eekheisst ia prest gomranauseas. 

 

—Quod est quo kwehro med mien gwit? —eesayct sib tun, eiskwend-ye shayad kwitres med tod question ia origins ios gjian quod schakhwatih ei un existence in quod id cras ne esiet id continuen ios hoyd samt ids meid os wakt, bet semject distinct ed semper neskohpten kam in ia antslehnkens iom nordamerican films, quer el ghestern gheus est el chef os un secret societat os hoyd, ed ia aventureus dactylographiste una incognito multimillionaire.

Solg naudhen om daumsa quod ne hieb possible satisfacens —dat is eet un aunsuccess inventer ed un felon exter id karcer— eelinkwt ei in ia subsequent brens un ragewent aciditat ed ia dents kheissas kam pos giues citron.

In ta circumstances ei einfiell bawlawias. Is hatta imaginit od i riches, plictic ob klues ia schikays im miskins, struxeer mahibe kafas qua quadrilles em cavalls eesehlkent. Palachi chusen ob sien augos eegveruent i traurics med kamchik pro gvehne kwauns, visiblascend ei certain scene: un mater, buland ed jolida, cursit kye apter id kafas ud quer, inter ia stanghs, eekalit iam ays kayk son, hin un "kunar", plictic ob klues iam mugihes, pelu tundes ep id cap, bayaldissih iam med id stolg ios kamchik. 

 

Vanievs tod coschmar, Erdosain saygit sib dekhschaten ob seswo:

—Bet qualg atmen, qualg atmen est tod quod ho? —Ed dat eys imaginen eegweupt id motor elan quod id coschmar ei hieb suwen, continuit: —Od ho gnaht pro ses un lacai, un tom profumen ed vili lacais con quens ias riche larinas lassent attache sib ia broscha ios pizdbehrer, menxu is maaschouk deumt un cigar cubhen ep id sofa.

Ed iter eys mehns eefallent antskandend-ye do in un cucin placen in ia kellars os un baygh deluxe konak. Perambh id table se eemovent dwo hajibs, ulter is choffeur ed un arabo qui eepehrnt jartiers ed profumes. In solg circumstance is vehsiet un sword jaquet quod ne eenact id cloin, ed un albh cravat. Stayg kaliet iom "is Poti", un wir qui eet eys physic dwin, bet qui ne eexeurt sien moustache ed qui eeneudt un bril. Is ne wois quo desirit ud iom eys chef, bet naiwo myehrsiet id singular spect quod so xubh ei salgend-ye id salon. Ed is eereict id cucin kay plehpe de sreups con iom choffeur qui, ant id joy iam hajibs ed id silence ios pederast arabios, eeranwt kam is hieb perverten iam dugter as un megil potnia, certain gohnos os pauk oumer.

Ed is repetih sib swo iter:

—Ya, io som un lacai. Ho id atmen os un druv lacai— ed eerinct ia dents ob satisfacen quando se hakarit ed humilyit med tod weidos ant iom swo.

Alya kers eevidt se salgend id kamer as un veut ed fidayi baclar, behrend samt effusion un gwaur bienki, bet in tod moment iom trohvit un pryster assidu ios dom, qui smeihend-ye, ed impassive-ye, bahsit ei:

—Kam leitmos con ia religieus dehlgens, Ernesto? —Ed is, Ernesto, Ambrosio au José, gwiviet barbeus-ye un gwit os obscene ed hypocrite sloug.

Un trehsen os follia eescutt iom quan is eemehnt de to.

Is woid, ah, kam is suawoid!, od is eet gratis offendend, murdareihend sien atmen. Ed id dekhschat quod kheisst is wir qui unte un coschmar fallt do in id abysse in quod ne siet mehre, eesubeiht is swo menxu eiskwmen-ye se eestect med slamm. 

 

Ob yando eys las eet os humilyen, kam tod im saints qui eekunent ia skars im duskweiters; ne ob compassion, bet kay ses meis aunwirtic ios pietat al Div, quel se kheissiet marzen os vide i paurske id warwn med tant repugnant pruva. 

 

Bet quando eedispareihnt ud iom ta images, ed tik eerestet in eys conscience id "vanscho os woide id sense ios gwit", is eebaht sib:

—No, io ne som un lacai... ne som druve-ye oino... —ed is hieb iskwen ihes ed budes sien esor kay ia sympathisiet con iom, kay ia rahimatiet eys tant hideus ed ghema mehns. Bet id mehmen od ob iam is hieb biht forcen tant ops ad sacrifice se, eepleht iom med un boder rancor, ed in ta circumstances is habiet iskwt nices iam.

Ed is wois gohd od sem dien ia taslimiet ad alter ed so eet un addihen element ad alter factors qua component eys gjian. 

 

Schowi quando is klohpt ia prest dwogim pesos, is staunit ob id facilitat med quod anghen ghehdt kwehre "to", maghses ob pre klehpte is credih tehrbe vinces un serie om scrupules qua in eys actual conditions os gwit is ne ghohd gnohe. Sib eebaht pos:

—Est un question om habe vol ed kwehre to, neid meis.

Ed "to" eerehmt id gwit, med "to" is hieb denars qua ei eecausent stragna khisses ob algve to eecost neid. Ed id ajib pro Erdosain ne consistit in id klehpt, bet od ne eet in eys wultu un kwekmor od is eet un fur. Is bihsit forcen ad klehpte ob is algvit un maigher salair. Octgim, cent, 120 pesos, ob tod mikdar depensit ia encassen quantitats, chunke eys salair se composit ex un dulal pro cada encassen cent.

 

Ithan, eent diens in qua is behriet inter quar e penkmil pesos, menxu is, mal-ye piuten, eetehrpt endure id stehnken os un jusdan ex fals lieter in quos interior se eekowpt id felicitat sub id forme om banknotes, cheques, girotransfers ed trattes pro el behrer.

Eys esor ei mambhit ia beghsses qua ia cadadien endurit; is klusit in silence ays mambhens ed pos, mon, bahsit sib:

—Quod est quo ghehdo kwehre io?

Quando is hieb id idee, quando un smulk idee yakinih iom od is ghehdiet khanye sien besi, is khiss id joy os un inventer. Raubhe? Kam to ne enfiell ei pre?

 

Ed Erdosain se perbluf ob sien aunimkania, hatta mambhend-ye sib mank os initiative, ob in tod zaman (tri munts ant ia narren wakyas) is endurit naudhen os quant buhsa, speit od cadadien passeer ep sien hands crohscen quantitats om denars.

Ed quo facilih eys fraudwent maneuvres buit id mank os administration quod eet in id Sukercompagnie.