I sept akmaks (Id surprise)

Sellamat, sambahsa bahtors, ed curieusi daydey qui ne dar bahnt sambahsa!

Som nundiens orbatend ep mien sambahsa tarjem ios roman "I sept akmaks" (Los siete locos) os Roberto Arlt, un argentine scriptor (1900-1942). Id wehrg buit publien in 1929, ob quo ne esient problemes au limitations con ia copierects. Id tarjem leit naturelika destull lent, dat euco sambahsa payn pon december ios senst yar ed naudho dar maung werds qua semper tehrbo paurske in ia dictionars (espaniol ed englisch). Sammel, ed ob mien frequent paurskens, kwehro corrections ed additions do id espaniol dictionar, ed ithan id sessiet spehwent-ye in id futur meis wassic ed completer, kay anghen ghehdt effectiver-ye nudes id. Punor, ne dar finleiso id buk os Arlt pet, schowi id tarjem siet eme wakt... Id gohd khabar est, od yu ja ghehdte lises id prest capitule os id! En id:

I sept akmaks

Roberto Arlt

Id surprise

Ghyanend-ye id dwer ios jusay, cristallen med japanese schibs, Erdosain iskw rikes; is fahamit is eet lusen, bet ja eet pior sert.

Iom skohpteer is director, un wir os ghem pletwos, teupsess, samt apercap, greis kays hajamaten à la "Humberto 1º", ed samt un ziyan spect filtrend se per ir greis pupills kam ta es un pisk; Gualdi, is bukhalter, smulk, cuitmaigher, melsk, samt penetrend okwi; ed is subdirector, son ios wir samt apercap, un kharen trigimat yuwen, samt id kays alnos kwit, cynic in eys wultu, samt akri voc ed kaurd specto kam tod os sien pater. Toy tri anghens, is director kneigvend ep sem hissabpianjis, is subdirector cubhen ep un stron med id jamb oismitten ep id clintor, ed is poti Gualdi muadeb-ye stahnd prokwe id scribtable, ne antwohrdteer ei salut os Erdosain. Tik is subdirector limitit se ad stehle id cap:

—Habmos id denuncen od yu ste un swindler, od yu habte raubhen sixcent pesos.

—Plus sept cents —addihsit poti Gualdi, menxu is passit un secant ep id signature quod in un hissabpianji is director hieb rubrien. Dind, is, kam strehngend se ep sien coll os taur, livit sien spect. Samt ia finghers traben inter ia butontorms ios vest, is director xubh un zirek spect, per ia endercluden lids, kun is aun rancor examinit id lagar wultu os Erdosain, qui ambhkung impassible.

—Ma leitte yu tant mal-ye dun? —questionit.

—Algvo neid ka encasser.

—Ed ia denars qua yu habte raubhen ud nos?

—Ego ho raubhen neid. Sont lughs.

—Dind, ste in condition os suacourante, yu?

—Sei yu eiskwte, hoyd pet ye id middien.

Id antwehrd salvit iom transitor-ye. Ies tri wirs consulteer mutu med id spect, ed, ultim-ye, is subdirector, plectend-ye, saygit sub id acquiescence ios pater:

—Ne… yu habte wakto tiel cras ye penkdem saat. Bringhte ia hissabpianjis ed ia ikrars… Yu maghte linkwes.

Iom prebluf tant tod resolution quem remanit ter perischan-ye, stahnd, spehcend iens tri. Ya, iens tri. Iom poti Gualdi, qui tant hat humilyen iom speit ses un socialiste; iom subdirector, quis samt insolence hat halten ia okwi ep sien disfibert cravat; iom director, quos stip cap os xuren aper eetourneut kyom, filtrend un cynic ed obscene spect per id canut streug iom endercluden lids.

Lakin, Erdosain ne bewohgh se ud ter… Iskwit sayge ibs semject, ne woisit kam, bet semject quod comprehendeihiet iens id hol immense bieda quod vyig ep eys gwit; ed remansit ithan, stahnd, yui, con id sword cube ios isern scattule ant ia okwi, kheissend od unte meis ia minutes passeer tant meis eys regv bugh, menxu is nerveus-ye trikwit id pterg os sien sword hat, ed eys spect bihsit meis fugen ed skeud. Pos, khaschen-ye, sprohgit:

—Dind, magho linkwes?

—Ya…

—Ne… levert ia ikrars ad Suárez ed cras ye penkdem saat ste her, aun fault, samt quant.

—Ya… quant… —ed, tournend-ye, salgit aun salute.

Pri id Chile strad gwohmit tiel id Paseo Colón. Khissit swo invisible-ye trohngen. Id sol aunstohg ia mergist interiors ios kleitustrad. Different mehns yohs in iom, tant kensamlik, quem id wehrg os classe ia habiet ei occupen maung hors.

Serter hat mohmen od ne hatta unte un dakika hat is mohnen daume quel ghehdiet iom denuncevs.